香港赤鱲角機場興建第三條跑道惹來環保團體爭議，但新任機場管理局行政總裁林天福（Fred）喺機場客運大樓踩單車發電，相信環團一定舉腳贊成。機管局日前啟動有關節能嘅互動展覽，並喺機場接機大堂放置一棵高逾兩米、以回收玻璃樽裝飾組成嘅「綠色能源樹」，邀請市民即場做運動點亮能源樹。Fred就率先夥拍中華電力總裁潘偉賢，利用中電自行研發嘅「踏步發電機」體驗人力發電，而踏步三十秒產生嘅電力，已經足夠一般智能電話通話一小時。Fred實行將汗水化為電力，一舉兩得。
