向來敢言嘅滙豐亞太區前主席艾爾敦（David Eldon）日前發表網誌，指特首梁振英（CY）被揭秘密收取海外酬金，已經觸及國家領導人底線，估計CY將會被北京要求下台，仲預計政務司司長林鄭月娥可能會短暫接班添。言論一出，滙豐隨即同艾爾敦劃清界線，澄清評論係艾爾敦以個人名義發布，唔代表滙豐喎。不過事隔幾日，艾爾敦尋日又有新嘢發表，叫佔領示威者釋出善意同港府對話，疑似為網誌言論補鑊。
艾爾敦呢位資深銀行家尋日以個人身份回應美國《彭博》提問，表明除非佔中持續長時間，損害營商而迫使企業重新考慮係咪撤資，否則佔中嘅殺傷力實際上比○三年沙士一役更低，外國企業現時提出撤離香港係危言聳聽（alarmist）咁話。
艾爾敦仲話，示威者應該停止窒礙香港經濟，港府先可以同學生代表等重啟全面、公開嘅對話喎。佢忽然幫港府講好話，莫非為日前網誌嘅言論補鑊？