改置北角政府合署
尋日中午，財經事務及庫務局就宣布，即時起將原本投放於政總嘅投標箱搬位，投標人士需將標書投去北角政府合署地下政府物流服務署投標箱。由於決定突然，估計唔少公司同投標人都會受影響，所以財經局都特別呼籲投標人留意截止日期，避免延誤，仲強調逾期遞交嘅標書概不受理喎。
據了解，一般要拎去政總投放嘅標書，都唔係租個停車場、投個學校餐廳嗰類，而係相對重要及大額嘅，過去有啲入標人嚟投放標書都好大陣仗，有啲標書更涉及模型，有啲或者係標書內容太緊要，甚至要派專人保護送達。依家政總條車路唔通，行路去政總入標真係唔方便兼多咗風險，可能係咁，政府惟有移船就磡嘞。