中環出更：復會博出鏡 議員黃藍鬥
受佔領行動堵路影響，立法會要延至尋日先舉行新一年度首次會議，但由於連日警方同示威者屢次因為「清場」發生衝突，建制派及泛民主派議員出席會議時就分別喺身上掛上象徵支持警方嚴正執法嘅「藍絲帶」，及支持示威者和平集會嘅「黃絲帶」，紛紛諗住透過衣着博出鏡。不過，最搶眼依然係議員蔣麗芸（Ann）。
一直支持警方依法處理佔領示威行動嘅阿Ann，尋日就着住件淺藍色套裝，心口佩戴一條藍絲帶，非常搶眼。阿Ann話，香港警察嘅質素冠絕全世界，但集會人士連日對警察惡言相向，令佢哋備受壓力。
用實際行動表態
佢覺得示威者不應做出挑釁行為，亦不應打擊警方士氣，所以尋日特登用實際行動支持警方繼續執法。
除咗阿Ann外，唔少建制派男議員都打藍色呔支持警方，包括旅遊界姚思榮、陳克勤等。另一方面，一眾支持示威者集會嘅泛民主派議員，尋日就選擇着黑衫同佩戴黃絲帶示人，好似資訊及科技界莫乃光（Charles）就着住成套黑色西裝去開會，話要聲援留守學生繼續抗爭喎。
佩戴絲帶兼攜遮
泛民原本想開會前喺會議廳內打開黃色遮，以示佢哋願意同示威者攜手抗爭，繼續打呢場持久戰。不過，由於有電視台影到警方涉嫌毆打示威者嘅片段，泛民就將開遮行動改為記者招待會。雖然泛民無舉到遮，但人民力量陳志全同陳偉業就特登攞咗把黃色遮入會議廳，吸引眾人目光。
卓妮