暴力係一隻魔獸，以不同化身出現喺大家身邊，嗱，有時甚至唔使郁手郁腳動刀動槍o架，霸住條路等你無得返工返學做生意，已經係一種令人髮指嘅暴力行徑，如果唔係，佔中都唔會搞到天怒人怨，罵聲不絕喇。
同樣道理，語言暴力唔一定要面對面指罵，透過網絡世界發動人身攻擊，所造成嘅傷害更加嚴重、更加深遠、更加無遠弗屆。但係港府唔知係眼盲定心盲，居然對呢種暴力罪行視而不見，袖手旁觀，助長歪風，簡直豈有此理！
網絡欺凌問題究竟嚴重到乜嘢程度，睇吓兩個受害者嘅經歷就一清二楚嘞。第一個受害者係遠嫁法國嘅台灣人氣博客「亞歷山大母親」，佢一二年起為混血兒子開設專頁，向親友分享作為幸福母親嘅喜悅，由於兒子模樣趣致萌爆，網頁迅速爆紅。點知人怕出名豬怕肥，呢位人氣母親慘成批鬥對象，被本港部分網民判定為利用兒子「賺名賺利」，搜羅「罪證」，留言辱罵，猶如公審，而最近仲被人刪除專頁滅聲添，認真無助兼無奈。
而第二名受害者係一名人稱「百元港女」嘅本地九十後少女，佢早前喺社交網站貼文指自己曾經向一名喺地上拾到一百元嘅男子假稱係物主，騙取咗一百元，結果惹來網民圍攻，唔止被人號召檢舉，仲被起底公開個人資料，私隱備受侵犯。最恐怖嘅係，佢嘅個人網頁被「洗版」，好多留言都涉及人身攻擊，內容污穢，不堪入目。事後，當事人上載短片解釋，原來騙財一事只係自編自導，起因係有朋友被網上起底欺凌，導致患上抑鬱症，所以要藉呢件事引起大家關注網絡欺凌問題。
無錯嘞，網絡欺凌愈演愈烈，大家點能夠坐視不理o架。正所謂，你唔擊倒暴力，暴力就會擊倒你。網絡世界本來係人類最方便最龐大嘅資訊流通平台，但同時亦係不法之徒最方便最耍家嘅罪惡國度，有人聚眾欺凌，有人散播謠言，有人妖言惑眾，有人蓄意誹謗，簡直和尚打傘，無法無天。尤其喺香港，由於當局監管不足，網絡世界亂象叢生，儼然誹謗嘅溫床，罪惡嘅淵藪，對自詡「法治之都」嘅香港嚟講，簡直就係極大諷刺。
所以話，呼籲社會關注網絡欺凌問題固然重要，不過更重要嘅係敲醒港產官僚嘅神經。正如有執業大律師指出，外國唔少地區已經立例規管有關罪行，例如美國紐約州早已設立《所有學生尊嚴法案》，佛羅里達州亦喺去年實施反互聯網欺凌法，惟本港仍然零起步。功夫茶想問港府一句，你哋縱容網上暴力，任由不法之徒四處橫行，為所欲為，咁同做幫兇有乜分別！
古人講得啱，天作孽，猶可恕；自作孽，不可活。今日社會是非不分，其實就係欺凌文化蔓延嘅必然結果，如果港府繼續縱容網上暴力橫行，遲早搞到社會亂上加亂，自食惡果嘅咋！