政府在上個立法年度向立法會提交嘅條例草案名單多達廿八項，兼且唔少都具有爭議性，最後更因議員「拉布」搞到條例草案「大塞車」。一四至一五年新立法年度展開，政府日前就向立法會提交新立法議程，唔知係咪吸取咗教訓，政府打算提交嘅條例草案只有十六項，幾乎比上年度少一半，仲要多數都係預計冇咩爭議嘅。唔通政府都怕咗班成日玩「拉布」嘅議員，寧願少做少錯？
政府擬提交嘅十六項條例草案中有七項計劃喺上半年提交，九項係下半年。而擬提交嘅條例草案中有七項都係由財經事務及庫務局負責，預料唔會有太大爭議。
至於與政制相關嘅條例草案就只有兩項，包括關於被定罪或判監人士喪失參選或擔任公職資格嘅《選舉法例（喪失資格條文）（修訂）條例草案》，同有關一六年立法會選舉嘅《立法會（修訂）條例草案》，而後者更要視乎有關公眾諮詢而有所變動。莫非呢招就係政府唔畀班泛民癱瘓立法會嘅策略？