政情：毛范講自由 雙重標準

毛死口唔認收肥佬黎錢

數以百計反佔中嘅市民因為不滿肥佬黎同《蘋果日報》，連日堵塞位於將軍澳嘅壹傳媒集團總部，以阻礙《蘋果日報》出版。被指喺一二年立法會選舉前收咗肥佬黎五十萬元而又一直矢口否認嘅阿毛，尋日就聯同Gary以「香港本土傳媒關注組」成員身份發新聞稿，話《蘋果日報》新聞大樓門口被示威者包圍，令多份中英文報章嘅發行受阻，關注組譴責堵塞行為損害新聞自由，阻礙消息及資訊流通。

阿毛同Gary又話，香港社會享有出版自由，正常商業行為應受保障，市民如果唔認同個別媒體報道可以選擇唔買，但冇權阻礙人哋發行，影響他人嘅自由選擇；又話法庭已經發出臨時禁制令，警方應盡力執法。

肥佬黎嘅生意畀示威者影響一、兩日，阿毛就即刻拉埋Gary撲出來譴責示威者，又叫警方盡快執法。佔領行動半個月以來，示威者堵塞金鐘、銅鑼灣及旺角嘅主要道路，擺明就係違法，搞到學生哥冇學返、小商戶生意大減拍烏蠅、的士及小巴司機嘅生計都受影響。但點解又唔見阿毛同Gary為呢班苦主發聲，譴責佔領行動示威者阻人搵食，影響市民嘅生活同自由呢？反而仲為佔領人士加油。莫非佢哋心目中肥佬黎出報紙嘅自由緊要過市民嘅自由？