政情：中環出更：未婚夫唔准袁彌明瞓街
人民力量主席袁彌明（Erica）原定十二月底嫁人，但近期半路殺出「佔領行動」，婚期最終有冇需要延遲仲未知，但佢就幾乎日日落場睇住金鐘道佔領區。不過，我哋就唔多覺佢有響應大會嘅呼籲，帶埋帳幕通宵留守金鐘喎，唔通Erica就快成為人妻就額外錫身？
對於「錫身」指控，Erica即時呼冤，話自己身兼人力主席，有可能成為攻擊對象，有人力成員就擔心佢「瞓街」會易受狙擊，因而喺附近搭營「護主」，所以Erica為免勞煩人力成員保護，就費事通宵佔領喇。佢又透露，未婚夫林雨陽要主持電台節目而無暇經常落場，亦擔心安全問題而唔畀佢瞓街，但就願意晚晚車佢返屋企。
「佔領搞到黑咗又殘咗」
Erica曾經揚言冇普選就唔生B，但「好日子」會唔會因為佔領而延期呢？佢話婚禮場地布置的確因為佔領行動而遲遲未能夠確認，但就唔使改期喎，因為婚禮一切從簡。不過，Erica話今次佔領搞到佢黑咗又殘咗，之後要趕緊好好保養喎。
卓妮