政情：中環出更：港大法學院45歲校友練歌賀壽
法律與音樂表面上南轅北轍，但原來兩者一剛一柔，能於嚴肅與陶醉之間擦出不一樣火花。香港大學法律學院一班校友五年前開始組織一個合唱團，成員一年比一年鼎盛，適逢港大法律學院今年四十五周年紀念，一班團員趁收工後趕往上環排練，密鑼緊鼓籌備十一月十五日公開演出一系列迪士尼經典主題曲。
港大法律學院畢業生會合唱團集合唔同年代嘅校友，卓妮見佢哋表現專業，一啲都唔似業餘樂團，原來佢哋好多都學過音樂。好似指揮沈智輝（Jeffrey），四、五歲開始學鋼琴、小提琴及低音大提琴等多種樂器，現時公餘時間會義務擔任合唱團指揮累積經驗。佢話好多律師每日生活只有工作，長期對住堆書好苦悶，而音樂豐富佢哋生活，亦令一班校友關係密切好多。
背慣書 睇譜快入腦
唔少聽過佢哋演奏嘅人，都讚佢哋咬字清晰過其他業餘合唱團，但Jeffrey同合唱團主席黃碧如（Cleresa）就覺得合唱團最大特色，係大家都好大膽，可能平日習慣出庭，加上背慣書、記慣案例，睇譜好快入腦，所以即使冇乜點練習，表演時都一樣咁有台型。今次演出，Jeffrey特別揀咗呢兩年幾乎個個小朋友都識哼嘅《魔雪奇緣》主題曲，希望擴闊聽眾群。
多得法律學院校友會主席廖玉玲帶領校友會一直支持，加上樂團司庫張志英（Teresa）為合唱團開源節流，佢哋暫時每年都有盈餘可以撥入獎學金資助母校學生，未來更打算與其他慈善機構合作回饋社會。
卓妮