政情:中環出更:政總兩代飯堂多阻滯

俗語話「辛苦搵來志在食」,打工仔女咁辛苦都係為咗食餐安樂茶飯,但身在金鐘政府總部嘅公務員,要食得好、食得安心就唔係咁容易喇。皆因自從政總三年前入伙,都面對不同挑戰,公務員食飯以至飯堂經營都好艱苦,莫非政總真係風水唔好?

政總一一年入伙時,餐廳承辦商諗住有穩定數目嘅公務員返工,應該都穩賺冇蝕,點知開張同年年底就爆發退伍軍人症病菌,記得連時任教育局局長孫明揚都中招,老闆慨嘆當時生意足足跌咗一半。

該承辦商去到今年中再入標,但遭產業署以「價高者得」通知佢唔中標,飯堂做到上月廿六日就結業,搞到一班公務員食飯都好唔方便。

新承辦商開業受「佔領」影響

直到尋日,飯堂新承辦商終於開業,但政總就因為佔領行動而受影響,職員要返工以至運送食材都幾麻煩。我哋尋日去睇過,發現職員都要熟習新環境,又試過同一時間賣早餐同午餐,但午餐做唔切,搞到諗住早啲食飯嘅保安員要等一段時間先有飯開,睇嚟新老闆都要諗吓點樣應付嘞。

卓妮

第一手消息請下載on.cc東網iPhone/iPad/Android/Windows Phone Apps