食品安全問題一波未平一波又起，坑渠油醜聞未息，台灣又爆出豬潲油事件，果然係沒有最醜，只有更醜。可能知衰啩，香港食安中心第一時間宣布停止從台灣入口動物油產品，本來以為動作夠迅速喇，點知原來又係賊過興兵。台灣當局踢爆豬潲油嘅原料來自香港，等於摑咗港府一巴。黑心食品出口轉內銷，最終由港人食番落肚，問你怕未！
今次豬潲油事件，涉事嘅製造商共有近七十項油品需要下架，三百幾間下游食品業者受到波及。台灣當局追查後發現，問題油品來自三間公司，而呢啲公司又向香港嘅「金寶運」進口超過七百噸不可食用嘅動植物混合油。大家對於「金寶運」呢個大名係咪似曾相識呢？冇錯嘞，之唔係早前坑渠油醜聞中被指向台灣供貨嗰間公司囉。
唔係啩，坑渠油搞到滿城風雨，人心惶惶，涉事廠商居然若無其事咁，繼續財源廣進，卒之搞到香港再度淪為黑心食品嘅源頭，仲有冇再離譜啲呀！
咁都未算，台灣當局透露，事發後聯絡本港食安中心跟進，點知港產官僚將個波踢畀警方，話事件已進入調查階段，冇嘢可以幫忙喎。台灣當局無計可施，計劃派員來港親自了解情況。嗱，港府有口話人冇口話自己，台灣食安出事，港府義正辭嚴，左一句停止入口，右一句要求徹查，好嘞，依家輪到自己出問題，對方要求協助就左賴右賴，你話係咪不負責任吖。
香港素有美食天堂美譽，「香港製造」曾經係質量嘅保證，依家淪為黑心油嘅輸出地不特止，仲要勞煩人哋上門調查，諗落都幾悲哀。之前成日話兩岸食安事故不斷，大陸有蘇丹紅禽蛋、孔雀石綠魚、三聚氰胺奶粉等等，台灣有塑化劑食品同坑渠油等等，香港只不過係受害者，原來事實唔係咁，香港已經成為兩岸三地黑心食品產業鏈一部分，五十步笑百步嘅咋。
所以話啫，天下烏鴉一樣黑，唯利是圖、自相殘殺從來係中國人嘅劣根性。就講今次豬潲油吖，台灣當局懷疑香港冇生產豬油，唔排除「金寶運」嘅原料其實來自大陸。如果真係咁，兩岸三地從來料、加工到銷售，可以話各司其職，合作無間。有人話兩岸尚未統一，但黑心食品早已實現一國一制，可謂一針見血！
老實講，要杜絕問題食品，其實唔係咁難，無非兩條腿走路，一方面嚴懲黑心食品商，罰到佢哋傾家蕩產，以儆效尤；另一方面建立完善追蹤制度，全面掌握食品數量同流向。港產官僚大事就話無能為力啫，解決食品安全問題，保證市民食得安心，唔係咁都做唔到吖嘛？