政情：有相為證：立會會議室淪示威者劏房
我哋連日緊貼報道過，部分泛民立法會議員濫用接待訪客規定，過去多日不斷招呼大批佔領行動示威者上會議室廿四小時開會兼瞓覺，甚至有傳某泛民議員將立法會變為「佔中總部」。雖然有建制派議員向秘書處及主席曾鈺成投訴，但班泛民議員不但無收斂，有人更加縱容示威者將摺床搬入會議室，認真離譜。
連摺床都搬入去
根據建制派提供嘅相片，示威者除將大批大聲公同物資存放立法會十樓會議室外，有人仲搬咗四張床同被鋪入內，加埋幾個枕頭，會議室隨即變成劏房。為咗令會議室有更多空間等示威者可以「屈蛇」，泛民議員更將會議室內嘅長方形枱疊埋，又將啲櫈擺開，搞到其他人唔可以用會議室開會。
見到示威者連床都夠膽搬入會議室，議員葛珮帆尋日就去信批評秘書長陳維安執法不力，要求秘書處即時採取措施驅逐所有留宿嘅示威者，以及限制訪客進入大樓嘅時間，咪當立法會係無掩雞籠。