政情：今日你上鏡：黃傑龍送「冇食剩」優惠

香港每日產生嘅廚餘數量相當驚人，現時各界都絞盡腦汁設法減少廚餘，經營飲食業嘅稻苗學會主席黃傑龍（Simon，圖）就有妙法。Simon透露，旗下食肆平日好多食客都會食剩嘢，最誇張嗰次係有六個客人走咗，枱面竟然剩低八人分量嘅食物，相信主要因為「眼闊肚窄」。為咗改善呢個情況，佢諗咗條橋，就係提供一張綠色優惠卡畀冇食剩嘢嘅客人，下次再幫襯時可享優惠，鼓勵客人保持不留廚餘嘅良好習慣。