政情：內會選舉 拉布失敗

梁高票挫范國威長毛

聲言不滿Andrew連任內會主席嘅大舊，提名晒其餘六十八位議員出選，結果建制派鍾樹根、蔣麗芸、王國興、田北辰（田二少）及林大輝等議員都成為佢提名嘅對象。不過，樹根就話︰「梗係唔接受啦，咁無謂嘅人！」田二少亦表現得好不滿話︰「第五個先諗起我，咁唔好喇。」王國興就劈頭大罵大舊利用提名權嘥時間，結果只得范國威接受大舊提名，加埋議員陳志全提名嘅長毛，出咗三名候選人。

最後喺建制派人多勢眾下，Andrew以三十九票擊敗分別得到十四票嘅長毛同六票嘅范國威；而副主席就由泛民湯家驊喺冇競爭下自動當選。至於財會選舉方面，由於泛民有劉慧卿代表競逐正、副主席，大舊並無再以提名權「拉布」，最終一如所料由飲食界張宇人同保險界陳健波分別當選財會正、副主席。

莫乃光被寸唔敢直選

另外，商界議員林健鋒（Jeffrey）同獨立議員黃毓民分別喺內會提出要用《立法會（權力及特權）條例》成立專責委員會，前者要求調查佔領行動嘅組織策劃、資金來源等，後者就要求查警方對佔中集會處理手法。不過，兩人嘅提議觸發建制同泛民爆發罵戰，建制派質疑部分泛民議員被指收受政治捐款，反對Jeffrey提出調查係怕愈揭愈臭。

泛民亦向建制派反擊，資訊科技界莫乃光叫選民睇清楚利用權力監察市民、而非監察政府嘅建制派，喺立法會選舉要建制派「票債票償」。不過，工聯會黃國健就寸爆莫話︰「講票債票償？直選你都唔敢參加啦！」結果原定開半小時嘅內會足足嘥咗約三個鐘先完成，拖累緊接嘅財會搞到晏一晏先完會。