中環出更：避談佔領 男高官怕醜？
自從佔領行動示威者開放通往政府總部入口嘅天橋後，三千名公務員有工返，唔少記者就喺政總天橋附近守候路過嘅政府官員，睇吓佢哋點睇佔領行動。尋日被記者截停嘅就有商務及經濟發展局副局長梁敬國（Godfrey）及教育局政治助理施俊輝（Jeff），但兩人比起一眾女高官，顯得相當怕醜，唔肯停低講幾句。
過去幾日途經政總天橋返工嘅女高官，包括行政署署長蔡潔如、財經事務及庫務局常任秘書長區璟智及謝曼怡、康文署署長李美嫦等。面對大批傳媒包圍，一眾女官員都有停低講番兩句佔領行動對政府嘅影響，例如有「頭箍小姐」之稱嘅區璟智就勸市民喺參與佔領時要守秩序，珍惜香港作為安全城市嘅美譽；而謝曼怡就叫人唔該畀條路佢行吓。
梁敬國不斷「唔好意思」
不過，啲男高官似乎無女高官咁大膽，同樣面對追訪，Godfrey同Jeff就表現得非常避忌，Godfrey淨係識不斷講「唔好意思」。至於當Jeff被問到擔唔擔心學界會發起無限期罷課時，佢竟然話要返去了解吓先。究竟係佢哋細膽吖？定係政府使出女高官博大眾接受嘅策略呢？
卓妮