本港工廈改裝嘅情況非常普遍，賓館、酒吧、食肆、band房、劏房……五花八門，無奇不有。計功夫茶話齋，工廠仲有好多用途有待發掘o架，好似改建大型冒險樂園，相信都好有「錢途」o架。
唔係講笑o架，工廈管理亂象叢生，消防隱患層出不窮，一時火警，一時墜升降機，又點止驚駭咁簡單。唔少工廈上咗年紀，升降機殘殘破破，有啲仲係手動閂門嗰隻，唔單止懷舊，仲分分鐘變身跳樓機。前日之嘛，觀塘一幢工廈嘅升降機懷疑因為超載，由十二樓極速飛墜至地下，造成廿九人受傷，有傷者事後猶有餘悸，連記者提問都答唔到。你哋話嘞，工廈有咁多刺激驚慄嘅玩意，唔改裝成冒險樂園係咪好嘥吖。
「跳樓機」同「跳樓」雖然一字之差，其實後果一樣咁嚴重。你知啦，香港人返工放工趕頭趕命，好多時電梯超載亦一於少理，寧願警號響起升降機門閂唔到至死死地氣出番嚟。好似出事呢部升降機咁吖，據講超載已係常態，成日故障，原本設計載廿一人，今次居然夾硬逼咗廿九人入去，唔出事至奇。有專家估計升降機嘅警鐘同煞停裝置連環故障，係釀成意外嘅原因。
講真，今次冇搞出人命就話好彩啫，但冇可能次次咁好彩o架嘛。依家全港舊樓舊升降機不知幾多，危機四伏，至弊機電署完全矇查查，次次出咗事先知。嗱，今次觀塘出事後，佢哋係就係有派人視察，但結論流到冇朋友，淨係話升降機懷疑超載，冇斷纜情況，並會責成維修商七日內交報告喎。喂，次次出事交報告，交完報告又出事，幾時解決到問題o架？人命關天，點可以咁敷衍o架？
由於墜升降機事故實在太多，篇幅所限，恕不重複嘞。呢度想講嘅係，要杜絕升降機意外，辦法唔係冇，爭在當局有冇心嘅啫。除咗加強巡查，加重違規罰則，更重要係整頓現行升降機維修「價低者得」嘅外判制。業界為咗壓低成本，往往從人手開刀，以前三個人負責嘅工序，依家一腳踢搞掂，七個蓋冚十個煲，加上維修員待遇偏低，冇新人願意入行，令人手短缺問題雪上加霜。呢個行業生態一日唔改變，升降機意外一日唔會停。出入平安呢個願望好卑微啫，如果咁都達唔到，香港安全城市呢個招牌拆得嘞。
唔好忘記，升降機每日總乘客量近三千萬人次，足足比港鐵多五倍，出事嘅機率亦大好多。嗱，家陣已經民怨沸騰，萬一再發生「升降機毀人亡」嘅悲劇，高官唔使坐跳樓機啦，直接跳樓罷啦！