香江親友如相問，就說佔中反目了！
在這個喧嘩卻鬱悶的時代，真愛並不是甚麼執子之手，與子偕老；也不是甚麼你若不離，我必生死相依。而是，你若佔中，我陪你金鐘闖蕩，旺角黑夜；你若瞓馬路，我必安分守候！
佔中——加一把雨傘，竟也有革命的浪漫情懷！然而，佔中，一如老朽所指出——「撕裂社會，一夜沉淪」，佔中已令社會撕裂，從群體去到家庭單位，面書上劍拔弩張，「子非吾友也！」因對警察的態度有所不同，兩派互相指罵，場面悲壯過古人割席千萬倍！
老朽有細姪苦笑，想撇條女好耐喇，糾纏咗成十年都撇唔甩，今因佔中意見不同，女友話佢指學生幼稚，竟然摑佢一巴話佢先幼稚低能冇膊頭，呢啲男人唔死冇用！你話喇！咁嘅野蠻女友還如何相依！今次大家在恨與不和平下只好分手！十年來做唔到嘅嘢，今因佔中而一舉解脫，快哉！
看來，佔中不僅造成市民日常生活失序，上班的、上學的無不怨聲載道，而示威佔領區零售生意更是一落千丈，瑞銀估計，在最壞的情況下，十月份本港零售額會下跌百分之十一，相當於損失四十億元！
講真，學生哥未經過戰亂、饑荒、文革洗禮，難以明白老朽這輩人求歲月靜好、求溫飽的心態。上一輩人好言相勸「有書唔讀阻人搵食」係罪大惡極！後生仔一句唔啱聽又話要同老竇老母反臉，甚至威嚇叫搬走出去住！
搬走就難咯！一個容身嘅劏房都租四千五！咪玩喇！秋風已起，夜降白露，瞓馬路遲早傷寒，在家千日好，最多面黑互不理睬！打工仔只能吾日三省吾身：高否？富否？帥否？否！那就安心上班，努力搵食吧！香江親友如相問，都說不再佔中了！