新界地區本身有唔少私營骨灰龕，有部分由鄉事派背景中人經營，適逢政府早前決定立法成立骨灰龕牌照委員會（委員會），加強規管私營骨灰龕。鄉議局此時疑如夢初醒，立即向立法會提交意見書，話希望委員會入面有鄉議局代表。鄉議局今次咁遲先出聲，唔通依家先至知權益受損？
政府早前公布《私營骨灰安置所條例草案》，講明九○年前開始營辦嘅私營骨灰龕可以豁免監管，日後規管就交由牌照委員會處理。不過鄉議局似乎對此好有意見，批評當局一刀切以九○年為界限，扼殺好多龕場嘅生存空間，反建議劃線於今年六月。
除此以外，鄉議局疑似想增加議價能力，希望派代表加入牌照委員會，又話鄉議局明白新界鄉民民意，喺新界有地方性權威，如果有代表加入委員會，可以充分代表新界居民意向，甚有亡羊補牢嘅味道嘞。