政情：查佔中 建制截泛民胡
佔領中環行動持續超過十多日，警方首日施放數十枚催淚彈驅散惹來爭議，泛民主派議員單仲偕同郭家麒密謀於立法會復會後以呈請書方式，成立無傳召權力嘅專責委員會調查警方施放催淚彈一事。不過二人拖至近日先提交呈請書，旋即畀建制派議員爭相截胡，先有民建聯譚耀宗（譚sir）搶先提交呈請書擴闊調查範圍，商界議員林健鋒（Jeffrey）隨後接力亮出被視為「尚方寶劍」嘅立法會（權力及特權）條例，要求內務委員會成立調查委員會，調查佔中影響同前因後果。
單仲偕同郭家麒原定本周三於立會復會後首個大會，以呈請書方式要求成立專委會徹查警方施放催淚彈一事，不過由於立法會主席曾鈺成以安全為由取消會議，因此二人諗住下周三正式復會後再提交呈請書。但二人唔知係咪政治敏感度不足，連建制派暗中出招截胡都懵然不知。
兩專委會不能同期
譚sir接受查詢時證實，前晚已向立會秘書處提交呈請書，要求成立專委會調查佔中起因、演變及政府處理手法等議題。佢解釋，泛民嘅呈請書只係要求調查警方喺處理示威集會嘅手法，唔可以全面了解整個事件，於是決定另外成立一個專委會，又話唔擔心兩個專委會職能同工作會有重疊。
既然泛民同建制派代表都出動呈請書要求成立專委會，前者更係最早提出提交呈請書一方，不過反而主動權喺建制嗰邊。事關譚sir早喺前晚已經交咗呈請書，單仲偕尋日朝早先交，所以建制派成立專委會嘅要求會排喺泛民前面，加上《議事規則》規定同一時期只可以有一個專委會，換言之建制派一旦成功成立專委會，泛民至少要等足大半年，先有機會調查佢哋最關注嘅議題嘞。
健鋒誓揪幕後黑手
除此以外，Jeffrey進一步去信內會，要求喺今日會議討論係咪動用特權法成立調查委員會，調查佔中嘅組織策劃、資金來源、引起嘅公眾秩序同安全等問題。佢又事先張揚話基於有傳召證人嘅權力，到時可傳召佔中三子、壹傳媒老闆肥佬黎等人上立法會問話，相信一定可以搵出佔中嘅幕後黑手。
話時話，單仲偕等人由主動變被動，又慘被譚sir同Jeffrey左右夾擊截胡，只可以怨自己太過「老定」，依家真係喊都無謂嘞。