中環出更：郭偉強借師兄首歌打動街坊
有傳工聯會勞工界議員郭偉強，被內定下屆立法會選舉由功能界別轉戰香港島地區直選，接替該會資深議員王國興。而要升呢擔大旗知名度當然必不可少，郭偉強最新一招就係大打溫情牌，喺最新工作報告中疑借佢嘅華仁師兄、歌手李克勤「過橋」，趁機去訴說自己嘅北角情懷。
郭偉強最新工作報告名為「同里有親、和富家書」，主要係匯報過去嘅各項工作，最吸引人眼球係寫畀北角街坊同朋友嘅序言，主動提到早前聽到李克勤主唱名為《北京北角》嘅歌曲，對於入面嘅歌詞有共鳴，仲特別引用「想返北角，如沒有船，橋樑都可繼續建」等幾句歌詞，形容呢個係北角同和富嘅人文本色，自言會做好同街坊嘅橋樑角色。
為谷人氣去到盡
其實李克勤呢首歌早前曾畀網民批評為「維穩歌」，不過郭偉強都冇有怕，仲引用咗首歌嘅歌詞表明心迹，加上郭偉強之前踩單車推銷喺南區興建單車徑，以及粉墨登場同職業的士司機拍攝短片訴說業界訴求等，就知道郭偉強為咗增加人氣，真係可以去到好盡，唔知一班當區街坊受唔受落呢？
卓妮