中環出更：少明愛戴帽 不讓妻女專美
馬場年度盛事莎莎婦女銀袋日將於下月九日喺沙田馬場舉行，到時又將上演城中名媛穿戴各式別出心裁帽飾入場嘅盛況。尋日莎莎主席郭少明（Simon）及太太郭羅桂珍、大女郭詩慧（Melody）及細女郭詩雅齊齊現身宣傳，適逢莎莎國際前日公布十‧一長假期間的港澳地區零售銷售按年下跌約百分之一，表面睇生意上好似唔係好受佔領行動影響，不過Simon有苦自己知，牙痛咁聲話公司業績去年同期升咗廿幾個百分點，計起上嚟損失好慘重！
講開佔領行動，商界唔勞氣就假，Simon雖然唔係鬧得好直接，但今年銀袋日主題咁啱係國際時尚魅力，仲邀請國際著名帽飾設計大師設計一系列以香港為主題嘅帽飾。卓妮見Melody戴住一頂紅帽，上邊有一朵好大的白色紫荊花，似足香港特區區旗嘅紫荊花，唔通係想趁機暗撐政府？
囡囡鍾意玩「帽子戲法」
今年婦女銀袋日已踏入第十年，年年都要諗戴咩帽好，會唔會冇晒靈感呢？郭太話唔會，事關佢會交畀設計師去諗，因此唔使煩喎！Melody就似乎仲未玩夠，話帽飾有大有細，款式好多，而且年年主題都唔同，所以玩極唔厭。對於當日只有女士有得戴帽，男士會否好冇癮呢？Simon就話唔會，過往好多男士都打扮得好靚仔入場，有一年佢都不甘寂寞戴埋帽入場。
講起戴帽，郭太喺旁邊爆料話，Simon好鍾意戴帽，仲大讚佢戴帽好靚喎！原來Simon放假着便服時都會戴多種類型嘅帽，包括鴨舌帽、Cap帽及草帽等，既可以配搭衣服又可以遮擋太陽，一舉兩得，尤其係出海釣魚時一定會戴帽。唔講唔知，Simon除咗鍾意賽馬，亦好鍾意釣魚，經常坐遊艇到西貢或內地海域垂釣，藉此享受寧靜咁話。
卓妮