政情：周永新呻冇人理全民退保
政府八月公布委託港大教授周永新團隊提出嘅全民退休保障研究報告後，扶貧委員會只係開咗一次會討論，之後就冇下文。周永新尋日出席一個有關全民退保嘅座談會時，就大呻報告只係推出頭幾日有人討論吓，之後就無乜人理會，連政府至今亦未就報告表態，究竟係咩原因呢？
周永新話，可能因為撞正人大常委會公布政改決定，跟住學聯又搞罷課，結果搞到冇人吼份全民退保報告。佢又話，雖然推行全民退保一定會增加政府開支，但有時唔係只睇數字，所有政策都係政治決定。政府依家研究退保都係政治考慮，呢個課題喺社會已討論好耐，政府如果唔理老人問題，可能佢都會去佔中喎。
劉展灝指商界被針對
出席同一個座談會嘅仲有工業總會主席劉展灝及行政會議前成員林奮強，劉展灝批評香港有咩福利政策矛頭都指向商界，遲早搞到企業撤離香港，而林奮強就講講吓退保又扯到去話要建醫院，結果被台下參加者批評佢哋靠嚇同講廢話，認真尷尬。