中環出更：柬國貧童 感動馬露明
現代城市女性愈來愈能幹，但部分發展中嘅國家，重男輕女卻依然存在，只有男孩先可以受教育。國際培幼會為咗令呢啲國家嘅女孩有多啲教育機會，日前舉辦第二屆「愛．女孩」「筆．生幸福」活動，收集市民捐贈嘅新鉛筆於聖誕節前轉贈有需要嘅女孩手上。商務及經濟發展局前局長馬時亨大女兼活動大使馬露明（Christine）亦有現身支持，講起去年首次去柬埔寨探望兒童，印象深刻。
已婚但未有小孩嘅Christine本身好鍾意小朋友，去年跟隨國際培幼會去柬埔寨探望一班女孩。佢見到當地資源非常貧乏，但一班小孩並無因此而唔開心，反而對每樣事物更加珍惜，帶畀佢好多啟發，知道原來唔一定富有先至快樂。好多小朋友第一次見到Christine，熱情地不停叫佢一齊玩。
培幼會扶助女孩
至於成長於大家庭、家有九兄弟姊妹嘅國際培幼會副主席袁文俊（Royce），就更加體會到男女各有所長，兩者都需要被培養。由於佢自己亦有一對孖生女兒，所以三年前被邀請加入培幼會時，對幫助其他地區女孩更毫不猶豫。
對於去年該會被質疑行政費佔籌得善款六成過高，Royce解釋話，因為該機構始終較少市民熟悉，總會方面會補貼令行善款項維持在八成之外，佢哋亦同時開源節流，希望逐步被大眾認識後，數字可以漸趨理想。
卓妮