佔中超過一星期，由遍地開花變成遍地開拖，七國咁亂。即係咁，唔理乜嘢政見都好，都唔能夠否認佔中破壞力驚人，對各行各業造成極大打擊，再唔收手，全港七百萬市民真係攬住一齊陪葬嘅咋。
有眼見o架，攞佔中呢枚「核彈」嚟恐嚇中央政府，唔會有效果之餘，只會淪為大笑話，但就對香港經濟帶嚟災難性影響。先講港人最關心嘅金融市場，股市連跌數日，唔少投資者雞毛鴨血，雖然上周五港股尾段略有反彈，但因佔中持續，後市仍然陰霾重重。樓市更加唔在講，今個黃金周睇樓量急跌兩成，成交量亦係○八年金融海嘯後新低，問你怕未！正如「東方報業民意調查」顯示，兩成八受訪者擔心長期佔中令樓價下滑；兩成二直指失信心，買家業主抱觀望態度；一成半憂慮對樓市影響進一步擴大。對於股市下挫，三成一認為政治氣氛影響金融市場；兩成三直斥政治環境令投資者卻步；一成九指金融體系受深遠影響。
佔中點止造成樓股齊挫吖，其他行業亦嗌晒救命。旅遊業首當其衝，除咗內地叫停訪港團，澳洲、意大利、日本、加拿大、新加坡等地亦相繼發出旅遊警示，喺人哋嘅眼中，香港好似變成生人勿近嘅伊拉克咁，你話死唔死吖。旅客望港生畏，導遊冇工開、冇飯食，酒店亦門可羅雀，由「客搶房」變「房等客」，每日損失數十萬至過百萬元，簡直係一殼眼淚。
百貨商業僱員總會亦大吐苦水，指最少五十間喺佔領區嘅金舖停業，約千名售貨員受影響，佢哋本來每日有數百元佣金，家陣得番底薪咋。仲有呀，佔中令多處交通癱瘓，職業司機開唔到工，手停口停，生計都成問題，簡直係啞巴食黃連，有苦自己知。上述民調又顯示，四成四受訪者擔憂經濟損失無可估計；一成八恐怕出現倒閉裁員；一成半認為對本港嘅傷害有如沙士。
冇錯嘞，佔中即係玩火自焚，香港真係傷唔起o架。試諗吓，如果內地把心一橫閂水喉，市民連食都冇得食，水都冇得飲，爭取到民主又點吖？最大鑊嘅係，佔中搞到唔少學生無法上課。喂，學生停課一兩日就話開心啫，無了期停課嘅話，成績追唔上，影響一生o架。呢，尋日先有一位父親激動到喺金鐘企跳，就知衍生嘅問題絕對唔係講玩喇。
講到底，佔中已經令到社會嚴重撕裂，百業受災，香港元氣大傷，示威人士成日話「自己香港自己救」，實情就係「自己香港自己毀」，搞到神憎鬼厭，都係咎由自取嘅咋。