向來鍾意評論時事嘅天文台前台長林超英（黑英）尋日忽然在社交網站重提香港歷史，講起八四年的士罷駛事件，癱瘓整條彌敦道，後來更演變成暴亂和搶掠事件，後果令人痛心，究竟所為何事呢？
原來佢想講日前晚上有警察在新填地街受集體衝擊，位置遠離「佔旺」帳篷，亦遠離「爭取一人一票運動」嘅方向和理想，象徵暴亂苗頭已現，認為旺角目前正逐漸滑向八四年暴亂嘅翻版，所以好擔心。
由於黑英嘅貼文係講明向八十後朋友提供資訊，自然令人聯想佢係想講畀啲集會示威者聽，結果呢番言論旋即引來網民長篇大論嘅批評。
有網民話，知道喺旺角會有人借機搞事，但佢哋就係唔想畀啲人有機可乘，所以先留守旺角，一見到有滋事分子，就交畀警方處理。另有人叫佢相信呢一代年輕人，如果示威者現在離開，連日留守就會冇晒任何價值喎。
有網民認為，今時今日市民質素已經唔同，唔可以同三十年前相提並論，又話當年事件同目前現場睇到嘅相差太大，知道黑英關心學生，但希望佢要審慎了解。