政情：城大校長在美 籲學生撤離
各大專院校學生參與佔中集會期間，部分校長到金鐘政府總部外等集會場地，探望示威學生，又先後發出公開信及校內電郵，呼籲學生要留意安全、保持和平理性云云。不過，有學生就反映，過去幾日無法聯絡到城市大學校長郭位，仲張貼尋人啟示添！原來郭位身處美國處理公務，現正趕回港了解學生情況。
其實郭位早幾日已經呼籲過同學要繼續保持冷靜並時刻確保自身與朋友嘅安全，但尋日佢都有再向全體教職員、學生及校友發出大學公告回應，指擔心留喺示威地區嘅城大同學，呼籲所有在場同學盡快撤離示威地點，因為有關地區已不再安全。郭位強調，佢心中最牽掛嘅都係同學安全，相信關心同學嘅家人和老師嘅心情都同佢一樣，希望學生盡快撤離，確保個人安全。