中環出更：無家者世界盃 勾起WK波癮
社會近日太多紛擾，但無損一班準備參加智利無家者世界盃嘅香港代表隊成員意志。尋日一班球員及教練齊集九龍喇沙書院進行活動授旗儀式，正能量滿瀉。卓妮見主禮嘉賓之一嘅行政會議召集人林煥光（WK）精神奕奕，原來佢都好鍾意足球，但因為年輕時扭傷過足踝，後來就好少機會再踢喇。
尋日難得有機會再畀WK接觸足球，佢似乎非常興奮，仲諗起唔少往日嘅集體回憶，好似好多朋友當年買報紙只係抽當中體育版出來，因為全版都係足球消息。另外，以前亦不時有人在滾熱辣嘅石地足球場度唔着鞋踢波。可惜佢大學嗰陣腳踝受過傷，後來投身社會工作之後，又好難約齊人，所以咪冇再踢波囉！
李宗德中學踢波成習慣
同場嘅港超聯球隊「和富大埔」會長李宗德則係喇沙書院舊生，佢話母校每星期都有堂體育課規定要踢波，久而久之成為習慣，佢笑言自己中學唔願郁，多數做後衞喎。但WK啱啱相反，覺得足球一定要劇烈先至好玩。
卓妮