未見其利，先蒙其害，「佔中」行動佔街霸道，話爭取民主喎，結果「真普選」就無嘞，真垃圾就大把，搞到四圍污糟邋遢，臭氣熏天，香港變成臭港！
係人都知，有人嘅地方就有垃圾，家陣日日有數以萬計示威者周街紮營，話無製造垃圾都無人信喇。嗱，有環保組織估計，佔中首四日喺中環、灣仔及金鐘嘅集會已經消耗超過一百五十萬個膠水樽，當中約三成未喝光就遭棄掉，甚至有從未拆封嘅食物及新物資當作垃圾拋棄，簡直係一場環保大災難。
以尖沙咀為例，由於廣東道被示威者堵路封鎖，令食環署垃圾車無法進入海防道垃圾站收集垃圾，連日無人清理嘅垃圾堆到成座山咁高，部分膠袋仲破裂流出污水，臭氣沖天，中人欲嘔。其他地區如金鐘及旺角等亦唔好得去邊，同樣被聲勢浩大嘅垃圾袋群佔領，亂象叢生，烏煙瘴氣，淪為老鼠、曱甴嘅樂園，惡菌傳播嘅溫床，令呢場宣稱「愛與和平佔領中環」嘅運動徹底變成「臭與垃圾佔領香港」災難。
垃圾佔港唔係講玩，有礙觀瞻都係其次，最驚係衞生惡劣，爆出病疫，咁就大件事。非洲點解爆發伊波拉瘟疫？咪就係衞生環境惡劣囉。仲有喎，內地正在爆發登革熱疫潮，全國確認病例增至一萬四千宗，而與香港一河之隔嘅廣東省更加係重災區，至今已有四人感染死亡，香港無打醒精神全力把關，反而堆積垃圾自製危機，同開門揖疫有乜分別？常言道，災難往往不期而至。香港正陷入政治泥沼不能自拔，為咗政改、佔中拗到火紅火綠，根本無人關心經濟民生，更加無人關心垃圾問題，一旦被病疫乘虛而入，咁就分分鐘死得人多！
講起真係令人無奈，本來喺垃圾官僚嘅垃圾政策之下，「廢物圍城」危機已經日甚一日，依家佔中令政治生態進一步惡化，解決垃圾問題更加遙遙無期。嗱，立法會下周復會後預期會盡快審議俗稱「三堆一爐」嘅擴建三個堆填區及興建焚化爐計劃撥款申請，但有學者直言形勢絕不樂觀，擔心喺今時今日嘅政治氛圍下，有關撥款隨時又係泡湯收場，令迫在眉睫嘅垃圾危機變得更加嚴峻。
一言以蔽之，佔領中環一日唔結束，垃圾佔領香港嘅問題就不斷咁惡化，各方面都唔可以扮鴕鳥。佔領行動係時候收手嘞，霸道阻街除咗令到垃圾為患，仲搞到交通癱瘓、學校停課、商戶關門、遊客卻步，簡直神憎鬼厭，如果市民唔想香港變臭港、死港，係時候挺身而出嘞。