中環被佔 「鼠戰」爭場
「佔領中環」行動久久未平息，日前更一度由佔「鐘」擴散去中環，不但威脅中區經濟大動脈，持續落去更分分鐘迫令中區大型活動需要取消或轉移陣地，包括十月十九日舉行嘅「鼠戰中環」嘉年華。據聞有中環商界透露，嘉年華叫得上做「鼠戰中環」，一定唔會考慮移師其他地區，更笑言唔通改名叫「鼠戰九龍灣」咩？
置地集團作為中區商廈「大業主」，每年都會在中環遮打道舉行呢個別具特色嘅籌款嘉年華，九年來一直企硬選址中環舉行，除咗畀一班平日恤衫西褲嘅金融才俊落中環主場角色扮演外，仲凸顯中環作為世界商業樞紐嘅地位。
咁啱「鼠戰中環」十月同佔中撞期，一眾籌款「鼠輩」會唔會被迫同佔中示威者「決戰」中環呢？據有份籌辦嘅管理層透露，嘉年華如無必要絕對唔想移師陣地。不過，佔中示威者一旦嚟「爭場」，睇怕真係要一戰定勝負喇！