香港回歸後「馬照跑，舞照跳」，呢兩句話深入民心，可見跑馬對香港人嚟講真係好緊要。之前有馬主聽聞，由於佔中行動令港島區警力不足，嚟緊八號同十五號兩日跑馬地夜馬，都要改去沙田馬場跑。
雖然馬照跑，但對於去開跑馬地夜馬嘅馬主嚟講，就好唔方便，怨聲載道。馬主話，每逢跑馬地夜馬，都有幾萬人出入，警方要派人手應付人潮，又要封路。不過，馬會解釋，跑馬地夜馬改去沙田係由於跑馬地馬場地底進行緊渠務工程，馬場要十月中先重開，但馬會唔評論佔中行動嘅警力。警方亦都話，既然馬會話係渠務工程，警方唔評論人手問題喎。
渠務署話，跑馬地地下起緊蓄洪池，年初已經同馬會傾好，有賽事會受工程影響。原來係虛驚一場，跑馬地無夜馬跑，同佔中行動無關。