政情：激進泛民誓「拉」倒創科局
立法會將於下星期三召開新一個立法年度嘅首次大會，雖然仲未知會否受佔領中環行動持續影響而取消，但商務及經濟發展局已排頭位在首次會議提交成立創新及科技局（創科局）嘅決議案，等財務委員會（財委會）通過撥款申請後就會正式成立新局。不過，人民力量等激進泛民主派早喺上個會期已經向秘書處提交多項修正案，仲表明今個立法年度會咬實唔放，總之實行「拉布」拖垮創科局成立。
雖然決議案嘅性質同其他條例草案唔同，每位議員只係得十五分鐘發言時間，但據聞激進泛民表明拖得幾耐就幾耐。人民力量（人力）早喺六月已向秘書處提交逾卅項修正案，雖然最終未能趕及喺上屆會期內討論創科局決議案，要留待新會期討論，但人力之前提交嘅多項修正案仍然有效，可以繼續提出。人力議員陳志全（慢必）話，希望到時淨係辯論同投票都要用多幾個鐘時間。
聲言財會再拉布
慢必話，到時佢哋除咗會就修正案不斷發言外，仲會透過要求點算法定人數等方式拖時間，總之唔會咁容易畀佢通關。唔單止咁，佢話創科局嘅撥款申請仍然有待財委會審批，而佢哋將會喺財委會提出大量修正案，初步估計，至少拉到年底先至討論完，等政府想喺今年內成立創科局嘅大計落空，咁嘅格局，相信最頭痕嗰個，會係負責嘅商務及經濟發展局蘇錦樑（Greg蘇）。
如果創科局成立後，Greg蘇唯一好處只係管少咗政策範疇，少咗嘢做。不過，一班資訊科技業界話晒已經爭取成立創科局多年，而大部分立法會議員亦支持成立，唔多唔少都為Greg蘇造成壓力，睇嚟創科局一日成立唔到，Greg蘇都唔使旨意甩身嘞。