政情：示威者再攻陷立會會議室
佔領中環行動持續，仍未有平息之勢，我哋尋日報道過，唔少示威者日日留守馬路搞到無覺好瞓，社民連立法會議員梁國雄（長毛）就以「接見訪客」為由長期借用立法會大樓十樓嘅會議室，畀有需要嘅示威人士入去瞓覺或休息，濫用立法會資源。不過，故事原來仲有下文，由於十樓會議室已經被示威者「攻陷」，有示威者轉為去七樓瞓覺，搞到班建制派投訴無會議室用。
議員投訴泛民濫用資源
有建制派議員投訴，尋日有大批示威者佔據立法會大樓七樓會議室，部分人更加即場喺度瞓覺，搞到佢哋冇會議室用。該建制派議員愈講愈嬲，話七樓明明係建制派辦公室，無理由有人會開門畀班示威者入去，相信係有泛民議員無視立法會規定，容許示威者入去瞓覺休息。有人仲搵埋秘書長陳維安投訴，要求秘書處嚴正處理，唔好再畀班示威者濫用立法會資源。
立法會秘書處回應話，議員可以帶訪客進入立法會大樓，但只限於該議員所屬樓層，唔可以去其他樓層，又話秘書處會繼續跟進事件。其實如果班泛民議員想提供場地畀示威者休息，可以考慮開放自己嘅議員辦公室，咁就唔使驚被人投訴啦！