中環出更：小吉培養小畫家
踏入十月，天氣開始轉涼，最適合到郊外寫生。維多利亞公園日前就舉行一個繪畫比賽，由藝育菁英基金主席方黃吉雯（小吉）、立法會前議員劉秀成（Patrick）、觀塘區議會主席陳振彬（Bunny）等擔任評審。表面上三位評審好似大纜都扯唔埋，但卓妮發現原來佢地有個共通點，就係同繪畫好有淵源。
雖然小吉謙稱對繪畫一竅不通，但有感於香港好多小朋友都有繪畫天分，奈何部分人因屋企唔夠資源，於是同繪畫擦身而過。所以兩年前佢決心創立咗藝育菁英，在全港十八區舉辦工作坊，讓有天分嘅小朋友學繪畫。
今次比賽脫穎而出嘅十名優勝者，更加有機會去俄羅斯參加為期一星期嘅藝術體驗之旅，食宿費用由基金包辦，機票獲航空公司贊助，並由小吉親自帶隊。
本身係建築師嘅Patrick，速寫相當耍家，繪畫當然難佢唔到啦，佢睇中嘅兩幅作品更成功進身十強，果然好眼光！提到其作品，佢話最鍾意學生時代所畫嘅北京天壇同印度泰姬陵。至於老本行建築，Patrick話芝加哥一定係建築朝聖地嘅首選，係高層、現代建築嘅發源地。
陳振彬大作藏櫃桶底
從事製衣行業起家嘅Bunny，原來都花過一年時間修讀室內設計，雖然最後都無做過相關行業，但佢話讀過室內設計，對製衣有好大裨益，尤其係顏色配搭方面。自詡對繪畫好有信心嘅Bunny，竟然將自己三十幾年前嘅大作收埋喺櫃桶底，希望有朝一日可以重見天日啦。
卓妮