睇美景大殺風景 眺望處一無是處

影相嘅時候,如果有路人甲乙丙入鏡,通常你叫佢借過,對方多數都會從善如流。不過咁,如果閣下有去過康文署眺望處觀景嘅經驗,就知道有時「搶鏡」嘅非常頑固,叫極都唔聽,都幾無奈。

係咁嘅,香港美景處處,康文署喺全港設置十六個眺望處,唔少遊客一心諗住飽覽風光,點知去到現場至發現,好多眺望處被大樹所阻。好似深受遊客歡迎嘅深水埗龍翔道眺望處,話就話可以俯覽整個九龍半島以至港島高樓,仲有埋「真實相片」嘅展示板添。可惜吖,聞名不如見面,將相片同現場實景一比之下,發現相中超過八成景觀都被樹木遮擋,有帶埋一家人專程前來觀景嘅市民大為掃興,話以後唔會再嚟。又難怪嘅,觀景變觀樹,大殺風景,唔嘈就假啦。

件事本來好簡單,有樹阻擋視野,修剪一下咪得囉。哈,港產官僚有名懶得就懶,又最鍾意卸膊,康文署發言人話喎,植物修剪係由建築署負責嘅,如果樹木太高阻礙景觀,會要求署方跟進,而建築署則大腳長傳,將責任踢畀承辦商,要求增加檢查同修剪工作。亦即係話,千錯萬錯,都係別人嘅錯,淨係港府官僚冇錯啦!

都係嗰句,官僚靠得住,豬乸會上樹,連修樹咁簡單嘅嘢都做唔到,你話啲官僚係咪廢柴吖。正如有立法會議員話齋,旅客去到眺望處後先至發現景觀貨不對辦,必然會嚴重影衰香港旅遊形象。

講開又講,今時今日喺香港郊遊,掃興嘅事又點止景觀貨不對辦吖。話說郊野公園裏面設有遊客中心,原意係提供遊覽資訊,實際上好多中心嘅展品簡陋到冇朋友,求其貼張海報介紹景點名稱等基本資料,同埋裝部電視機,不斷重播郊遊安全短片就算數,難怪終日拍烏蠅,得物無所用。

當然啦,掃興事小,生命安全受威脅先至大鑊。呢,早排連場大雨,部分遠足徑隱藏山泥傾瀉同塌樹危機,點知當局做嘢求求其其,淨係封咗部分危險路徑,又冇加圍欄,又冇豎立警告標誌,淨係貼張通告就當交差,行山人士一個唔覺意誤闖危險地帶,你話係咪靠害吖。行山唔安全,踩單車一樣係危機四伏,有啲落斜路面直剷迴旋處,有啲路面無故收窄,有啲冇分段路牌指示,一旦有人受傷叫白車都好難講出確實位置,隨時延誤救援,簡直係收買人命呀!

講到呢度真係有啲悲哀,香港家陣廢氣嚴重,戾氣更重,好多人負能量爆燈,想話去郊外呼吸吓新鮮空氣,睇吓自然美景啫,唔通咁樣都係奢望?