好多參與佔中集會嘅人士或市民都在衣服上繫上黃絲帶，表示支持爭取普選，但亦有部分市民選擇繫上「黃絲帶加藍絲帶」，代表支持爭取普選之餘，同時亦支持警察執法。尋日我哋入到沙田馬場，就見到一班馬會大董都戴住黃藍絲帶，莫非佢哋都要表明立場？原來「黃藍絲帶」只係馬會大董長期使用嘅證章。馬會大董梁高美懿話，其實佢冇諗過大董證章會撞咗黃藍絲帶嘅意義，一班大董之間亦冇討論過呢個問題，但佢個人係支持警察執法喎！
