政情：陳健波去酒會途中被辱罵
佔中行動示威者佔據中區唔少主要道路，有立法會議員就話呢兩日無論開會定出席活動都一波三折、困難重重。保險界議員陳健波話，日前去立發會開會時要兜遠路步行前往，尋日去灣仔會展出席十‧一升旗禮及酒會活動時，更一度被困鐵馬陣內，仲要被示威者辱罵添！
與示威者口角
陳話尋日早上七點幾鐘前往會展舊翼，因正門無法進入，遠遠看見工聯會理事長吳秋北與一名示威者正在交談，以為該路可行，點知行咗過去先知該路不通，想折返時就被示威者嘅鐵馬擋住去路，於是佢行去移開鐵馬，期間同一名示威者對峙並發生口角，最終要由保安帶領下才可順利進入會場。
不過，陳相信好多示威者係有理想嘅，只有極少數不理性，同時佢亦體諒警察嘅工作，覺得市民不應因個別警察嘅行為或言論，而批評整個警隊；又話見到唔少警察須徹夜留守，希望市民明白警察係好難做兼好大壓力喎。