政情：「糧油大王」之子廣傳通勝學問
部分老一輩嘅人都有查通勝嘅習慣，尤其對糧油出入口商來說，當中二十四節氣及每日宜忌事項更特別有參考價值。人稱「糧油大王」嘅明泰食品董事長兼首席執行官李廣林，每年都向市民免費派自家撰寫嘅通勝，日前我哋喺一個活動上見到其兒子李豐年。原來佢接手家族糧油生意之餘，對爸爸嘅通勝亦略有研究。
「好多有趣內容」
李豐年話，細個時因為反叛，總係唔鍾意聽爸爸教，尤其要佢學通勝呢類咁傳統嘅學問，佢就更加冇興趣喇。不過，隨住佢接手做家族生意之後，就多咗好多機會睇通勝，事關唔同節日氣候都與稻米等穀物收成息息相關，所以通勝記載嘅資料就成為佢預計貨源嘅重要依據，留意得多，逐漸發現通勝好多有趣嘅內容同知識添！
李豐年仲透露，通勝唔單止成為佢同朋友茶餘飯後嘅話題，有時佢客串做活動或婚禮主持時，更可以藉此分享唔同節日嘅典故來源，將有關傳統流傳下去。