政情：佔中爆發應驗車公靈籤
「佔領中環」行動踏入第五日，淪陷地區進一步擴展至重點旅遊區尖沙咀廣東道，學聯尋日仲發出最後通牒話要包圍政府建築物，相信無論政府，就連佔中三子都勢估唔到局勢發展成咁。事實上，如果大家仲記得，新界鄉議局主席劉皇發及東方報業集團先後喺農曆大年初二及八月中到沙田車公廟為香港求籤，有關香港局勢及佔中行動嘅籤文，幾乎一一靈驗。
行動失控印證「變數大」
記得發叔喺農曆大年初二，按傳統到車公廟求神問卜，為香港運程求得一支第四中籤，籤文曰：「福無私與皆天賜，禍不空生自有招；一片婆心能積善，自然福長禍潛消。」解曰：「家宅興吉，求財半遂，自身平安，堅心求謀。」當時有解籤師傅直指籤文所指嘅「禍」，寓意若香港內部勾心鬥角，必會自招禍害，更預測下半年會出現大型騷動，最有可能就係佔中行動。
點知直至八月，有關佔中行動傳聞不斷升溫，東方報業集團就為港府管治及佔中行動再求得車公靈籤，其中為佔中求得籤文曰：「真似假時假似真，弄假成真那曉因；世人難識真和假，真假如何兩不分」。堪輿學家李丞責當時直指籤文反映佔中變數好大，結果佔中「變數」相當靈驗，佔中三子、學聯及學民思潮就政改叫價愈叫愈高，令佔中行動去到一發不可收拾嘅地步。
各界團結做好事可化解
現時佔中行動已將香港推向「唔係你死就係我亡」之境地，究竟點樣先可化解今次危機呢？雖然發叔話平息佔中已超出佢嘅智慧，但其實都可以綜合年初多位解籤師傅提出嘅化解方法，包括社會各界同心合力做好事、有商有量、不要勾心鬥角及自亂陣腳，才可福長禍消。雖則話求神問卜毋須太認真，但年頭車公靈籤預測確實擺在眼前，真係信不信由你！