中環出更：梁繼昌訪德 見識「啡」常煤炭
社交網站連日來被佔中消息洗版，但尋日卓妮就發現立法會會計界議員梁繼昌（Kenneth）貼咗張另類相片，相中有人手持一舊長條形嘅啡色物體，仲形容為「a piece of sh_t！」添。當然Kenneth只係講笑啦，睇埋下文，先至知呢條啡色物體係環保煤炭。
原來Kenneth由上月底開始去咗德國公務訪問，同當地政商界交流政改、法律改革、金融及能源等議題，相中嗰條啡色物體就係佢參觀柏林一間回收公司時見到嘅環保煤炭。Kenneth話此行獲益良多，增加咗佢對當地廢物處理系統認識。
睇番Kenneth喺德國嘅行程都幾緊密，包括去法蘭克福參加商界聚會、金融界高桌晚宴、外交界聚會、並同德國國會副議長及人權委員會主席會面等。Kenneth話，喺柏林嗰兩晚都瞓得好少，因為手機入面嘅即時通訊軟件不斷傳嚟香港嘅消息，搞到佢心掛掛喎。
卓妮