政情：貝鈞奇行船唔曉游水
香港中華出入口商會尋日舉行十‧一酒會，我哋見到副會長貝鈞奇手上有個好得意嘅彩色印水紙紋身圖案，原來佢五日前被信興集團副主席蒙德揚拉咗去睇水球比賽，仲話要整個印水紙落佢塊面度，但佢費事出席活動唔方便，所以就印落隻手度算喇。不過，佢笑笑口話呢幾日係有沖涼o架！
原來啲印水紙好襟用，無論佢點樣用皂液洗手，手上嘅香港水球隊標誌同文字都洗唔甩，佢仲話蒙德揚搵咗班靚女水球員教咗佢好多水球知識添！講到水，貝鈞奇以前曾經有五、六年行船經驗，但佢竟然自爆唔識游水，仲話當年喺船上只係擔任無線電操作員，屬於文職，所以豁免考水試嗰關喎。