中環出更：張雲正叫市民適應「扣關」

深圳海關本月中開始突然嚴查快件車，唔少淘寶迷呻集運被扣關，等候時間長達七日仍未清關，有急用貨物嘅買家仲等唔切，要親自去深圳關口提貨，都幾麻煩吓。我哋前日在一個活動上遇到海關關長張雲正，佢話由於內地海關實施新政策，市民要慢慢習慣於集運時列清楚每件貨品種類及數量，需要一段時間去適應。

張雲正話，由於近年電子商貿成為主流，並愈趨普及，好多港人都鍾意上網購物，然後用集運送貨可慳番少少運費。不過，集運公司每次集合多張單嘅貨物一齊運送，好多時當中會夾雜違禁品而較難被搜出，因此長遠來說都係需要一個穩定嘅政策處理呢個問題，而香港海關亦都支持內地海關呢個新政策。

不過，佢安慰透過集運公司發咗貨嘅市民唔使擔心，因為只要發貨前向集運公司註明清楚物品內容，包括每件貨品種類及數量，漸漸養成習慣，流程就會變得順暢喇。

卓妮