中環出更：水禾田贈港人「三寶」化戾氣展歡顏

連日示威集會處處，但無阻「福幼基金會」前晚如期舉行二十年籌款晚宴，多位名人因交通擠塞，姍姍來遲。身為「福幼」董事嘅水禾田臨開席前才到達。佢話，早上一度拿起相機，由中環家中徒步至金鐘，想話見證大時代場面，但行到去金鐘外圍時遇上警員，才知上址已被封鎖。

「健康 快樂 自由」

雖然「食白果」，但水禾田話唔介意，更希望幫港人「療傷」：「好想做番啲嘢令港人笑番，開心番，社會需要融和。」佢即場拿起一件為「福幼」籌款的卡通笑面T恤，上面用英文寫上「健康、快樂、自由」，佢話港人依家最需要係呢「三寶」，希望大家和平共處，不再撕裂。

蘇蔡潔蓮（左）扶助內地農村學童上學，項明生（右）大表支持。（嚴少阡攝）

支持內地扶貧嘅朱鼎耀夫婦，冒住封路大塞車都去捧「福幼」場。

旅遊作家項明生都話心痛示威一發不可收拾，望事件盡快完結，佢公司都有員工加入聲援，但佢自己就未有參與，但會尊重同事的決定。

講番「福幼」，過去廿年扶助內地貧困兒童，董事蘇蔡潔蓮話，佢哋幫助內地殘疾兒童復康，又扶助農村學童上學，但明年初會在本港開設中醫館，贈醫施藥幫助弱勢社群。觀瀾湖集團副主席朱鼎耀都撐助學，過去幾年一直在內地建校扶貧，給小孩讀書識字機會，擺脫貧窮命運。

卓妮