「上天？雀仔？天神？」遊戲中的女同學不准說話，一時又指向天，一時又扮公雞，讓參加手語分享班的同學們估估她想表達甚麼。這個模擬聽障人士的遊戲令女同學哭笑不得，亦令大家明白到，原來聽障者單單想健聽者明白「早上」這個簡單的意思，也可能需要花上兩、三分鐘。

義工班教健聽者手語

可惜忙碌的都市人哪有三分鐘？「我公司以前三個聽障嘅同事走剩一個，我就諗佢哋係咪做得唔開心呢？」花花坦言聽障同事因無人願意花時間去跟他談話，常常獨自一人，為了可以主動去了解那位同事的心聲，令她一年半前決心學習手語。

花花希望透過舉辦手語分享班，讓其他健聽人士可以接觸手語。

同學們學習手語，希望可以幫助聽障人士融入社區及工作。

為令手語可以更加普及，花花和一班懂得手語義工更透過舉辦分享班，讓其他健聽人士可以接觸手語。「其實我哋日常生活用到嘅手勢，有時都係手語。」花花表示，手語對健聽者並非完全陌生的「語言」，大家均可以輕易學會簡單的手語，例如A至Z、一至十、打招呼等等。

「學咗之後對佢哋（聽障者）多咗認識，明白同佢哋講嘢，第一樣要學識嘅係企喺佢哋面前。」走進了聽障者的世界，花花坦言更深切體會他們的文化，學會由他們的角度出發，一改以前部分可能對聽障人士無禮的舉動。「要叫佢哋，最好就係輕拍佢哋嘅膊頭，或者喺佢面前揚揚手示意，唔再會一嘢拍落佢哋度，或者喺佢背後嗌佢。」

「好多年輕人上兩堂就覺得玩夠唔學，有啲就覺得同人用手語溝通會好奇怪。」花花指不少學習手語的人只有三分鐘熱度，因此期望與義工們推動手語普及，讓健聽人士不再抗拒主動用手語與聽障人士溝通，用生命影響生命。

不少僱主願聘請聽障者

不主動聆聽聽障人士的聲音，自然難以明白他們在生活上的困難。本港現時有不少聽障人士，花花表示，聽障人士的溝通受到局限，往往只能跟「圍內」的聽障人士交流。「喺呢個急速嘅社會，無人會慢落嚟去就你。」花花更指，除日常生活，在職場上聽障人士如果無法與人溝通，幾乎難以生存，「一係就做輸入員之類唔使講嘢嘅工，不過呢啲工太悶啦！」

語法不同易招誤會

「佢哋手語係會講︰『食飯有沒有？』唔同我哋！」花花指出由於手語的文法有別於日常說話，即使聽障者寫出想表達的東西，有時別人也未能明白其意思，造成誤會。

慶幸的是，在困難中總會見到一絲曙光。「其實聽障朋友戴咗助聽器就可以聽到八、九成，依然可以好有效率咁工作。」花花表示現時不少僱主均願意聘用聽障人士，其中有一家素食餐廳更有一半的員工為聽障者，員工之間可以手語溝通，亦令工作環境更加愉快。

「朋友多謝你哋參與和支持，希望下次再見到你哋」

圖︰關萬亨／文︰胡蔣明

提名熱線:3600 9999

Fax:3600 9900

E-mail:like@on.cc