政情：行業探索啟發 李文俊建王國
好多年輕人讀書時都未必知道自己將來想做咩職業，亦唔清楚有咩行業選擇，百仁基金過去十個月就特別為中學生安排行業探索活動，等佢哋將來投身社會工作時有多個行業選擇。原來身兼百仁基金主席的理文造紙創辦人李文俊（Raymond），在大學畢業時亦面對過選擇職業嘅難題，幸好佢曾經在加拿大讀書時參加過行業探索活動，造就佢打造出今日嘅造紙王國。
Raymond都曾經因為搵工而迷惘，讀電腦工程嘅佢當時有諗過做IT，但因為父親李運強想佢接手家族生意，但佢又唔想，於是諗起在加國參觀及了解過紙廠運作，加上睇準當時市場對商品包裝嘅需求，毅然決定創業開紙廠，一做就做到上市。佢話，好多人話依家少咗發展機會，但其實係唔同年代有唔同需求，時代變咗就自然要轉變。
倡港生赴內地發展
面對社會人口老化，Raymond話護理業嘅需求亦相應急增，環保工程亦一樣，年輕人可考慮在呢兩方面發展。雖然內地不乏人才，但唔少管理或會計等職位都偏好招聘港人任職，香港畢業生亦可以考慮。