中環出更：廠商會「蘇粉」多撐統
蘇格蘭早前舉行公投，決定是否脫離英國統治，成為獨立國家。雖然公投最後以大約十個百分點被否決，但香港中華廠商聯合會（廠商會）幾位會董日前講起呢件事仍然百感交集。立法會紡織及製衣界議員鍾國斌（Felix）仲透露，佢曾經在蘇格蘭留學七年，對當地零舍有感情，唔想蘇格蘭脫離英國統治喎。
Felix話，想當年佢讀緊中學嗰陣，屋企人想送佢出國留學，咁啱佢爸爸有個朋友嘅囝囝在蘇格蘭讀書，佢爸爸又以為英國同蘇格蘭係同一個地方，於是就送咗佢去當地讀書。點知去到當地先知道原來兩地係完全唔同嘅地方，但佢都由預科讀到大學，修讀建築及測量系，畢業後先返香港接手家族生意。
Felix仲話，蘇格蘭當地工業在七十至八十年代發展蓬勃，唔少工廠製作冷衫嘅質素都好高，所以佢都有諗過同當地人做生意，將當地製作嘅成衣引入香港，但後來因為當地成本太高，加上運費太貴而作罷。
陳淑玲諗過買古堡
廠商會副會長陳淑玲就話，佢年輕時喺英國讀書，放假時去過蘇格蘭玩，最記得就係當地優美嘅景色同宏偉嘅古堡。當年一座古堡只係需要十幾萬英鎊，搞到佢都心思思想買番座，但當佢聽到單係維修費就要另外使多幾十萬鎊時，維修期間又唔可以入去住，就打消咗念頭嘞。
另一廠商會副會長吳永嘉多年前都同太太去過蘇格蘭旅行，對當地嘅蘇格蘭裙同威士忌情有獨鍾。佢講笑話，好彩蘇格蘭獨立被否決，否則當地出產嘅威士忌價格一定大幅上升，佢就唔可以飲平酒。
卓妮