青年狂衝跳樓 飛廿米外墮斃
情困青年與女友「吵大鑊」，天台助跑飛墮廿米外慘死！九十後新移民青年，近日與同齡女友情海翻波，前晚在觀塘寓所致電女友「箍煲」不遂，又不滿被質疑講大話「喺屋企」，揚言跳樓自殺以證事實，女友聞言大驚報警。飽受情傷青年衝上天台危坐簷篷邊，救援人員趕至，青年雖曾返回安全位置，消防亦上前捉緊其雙腳，惟他突然掙扎衝前躍下，飛墮大廈對開馬路慘死；慈母痛失愛兒，哭成淚人。
死者梁偉豪（廿二歲），從事電話銷售，五年前由內地移居香港，與家人同住物華街華安大樓。街坊指，阿豪平日愛「蒲」區內「機舖」，友人暱稱他為「蠱惑仔」。阿豪有一姓劉要好女友，惟兩人近日感情生變，阿豪疑不堪分手打擊，終日悶悶不樂。
「你哋唔好埋嚟 我唔跳 我自己落嚟」
據悉，前晚十一時許，阿豪在寓所致電女友「箍煲」，惟劉女去意已決，又反問他身在何處，阿豪答稱身處家中，但劉女半信半疑，期間阿豪揚言以死證事實：「唔信？我跳落去畀你睇！跳樓死咗佢呀！」通話隨即中斷，劉女驚覺不妙，隨即報警求助。
阿豪此時奪門而出，直奔九樓天台，同時接獲劉女來電稱已報警，遠處亦傳來救援車輛響號聲，他憤然向劉女大喊：「你當我玩呀？我同你嚟真呀！」據住在同一大樓、目擊事件的十七歲巴基斯坦籍青年阿刀透露，當時阿豪坐在面向後巷的欄河上講電話，未幾經扶手梯攀至天台屋簷篷上危坐，情緒平穩。
數分鐘後，警員及消防登上天台，阿豪見狀大嗌：「你哋唔好埋嚟，我唔跳嘅，我自己落番嚟！」他退後數步後，有消防員即撲前抱緊其雙腳，但阿豪卻突然掙扎，繼而向物華街方向衝前躍下，飛越三條行車線直墮距大樓廿米外的馬路，重創昏迷奄奄一息。救護員把阿豪送院搶救，惜返魂乏術，死者母親及胞姊其後趕抵醫院了解，梁母驚悉噩耗後，當場崩潰痛哭。警方在場未有檢獲遺書，初步調查後，相信事件無可疑。
母嘆子：有勇氣跳落去 冇勇氣面對
昨晨九時許，死者母親、胞姊及兩名親友到殮房認屍，痛失愛兒的梁母傷心哭道：「有勇氣跳落去，又冇勇氣面對！」又指愛兒不應為情自殺，斷送性命。「唔理阿媽，唔理家姐，一句說話都冇留低就走咗!做乜事咁蠢咁傻，唔同人傾訴！」她又質疑兒子被人害死，「我個仔好乖，放假都喺屋企，有人害死佢啦！」昨午四時許，梁母及親友一行約十人，帶備水果香燭及一件衣服，在道士帶領下路祭，眾人神情哀傷，期間梁母痛哭高呼：「阿仔我好掛住你呀！快啲返嚟啦!」聞者心酸。