彩虹：74X線頻脫班 「等足九個字」
「話就話三至八分鐘一班，但係成日都要等足九個字先有車嚟，返工都由準時變遲到！」居於彩虹邨紅萼樓的陳先生經常於早上八時乘搭九巴74X線前往大埔，發現該路線經常脫班，曾多次向九巴反映，惟一直無改善，「淨係識話反映意見，但根本一啲改善都冇！」
常壞車被質疑欠保養
九巴發言人指，按行車紀錄顯示，有關巴士線於當日八時許，因巴士出現機件故障需回廠進行維修，導致班次延誤，強調將密切留意該線服務情況，在資源許可下作靈活調配。
陳先生不滿九巴回覆，指74X線巴士為彩虹前往大埔廣福邨唯一路線，有不少市民乘搭，要求九巴改善，「平時都成日脫班，係咪真係次次都壞車先？點解平時唔做好保養？」