多支英超球隊勁旅年前獲邀來港作賽，點知香港大球場因去水力不足，搞到嚴重積水，一班球員儼如喺泥地玩泥漿摔角，甚至有球員因此而受傷，大球場「草地變爛地」，一夜之間淪為國際笑話。為挽回大球場嘅聲譽，康文署就向鋪草皮了得嘅馬會求救，宣布明年四月一日起為大球場重鋪草地，費用同技術都係由馬會包辦，預計九月底前重新開放球場。有口痕友就講笑話，以前啲賭仔都係忙於為沙田同快活谷兩個馬場「鋪草皮」啫，點知明年就連香港大球場嘅草皮都要鋪埋，認真唔老利喎！
