佔領中環（佔中）搞手事先張揚十．一要擺「盛宴」，呢幾日仲做晒宣傳，叫啲參加者「去飲」，依家各方都睇實事態發展。政府內部有啲部門好緊張，有啲又似乎幾淡定喎，尋日憲報公布，財經事務及庫務局局長陳家強同商務及經濟發展局局長蘇錦樑（Greg蘇）將喺十．一後放假，不約而同揀正人哋「去飲」時齊齊抖吓，莫非睇唔到佔中就當無事？
憲報披露，陳家強會在十月三日放一日假，但之前兩日係公眾假期，加加埋埋即係有三日抖。至於Greg蘇就從十月一日放到十月四日，抖多陳家強一日。佢哋一個主管財經事務，一個主管商務及旅遊，竟然齊齊喺佔中期間放假，唔通內部有晒評估，唔驚佔中影響金融市場交易？亦唔驚中環商戶及訪港旅客受影響？
不過，有人話立法會十月初復會，之後政府連串大計推出，政策局嘅工作將排山倒海而來，啲官員想放假都只係得十月頭幾日咋。