政情：副局政助送別政總飯堂
金鐘政府總部飯堂因為投唔到標，做到尋日下午四點鐘正式結業。卓妮朝早行過入去望望，發現飯堂較以往多人排隊買餐，仲有多名副局長及政治助理捧場，一班侍應都做到踢晒腳。財經事務及庫務局政助趙必立、局長新聞秘書及政務助理都齊齊現身，而財政司司長政治助理羅永聰都去買外賣。政制及內地事務局副局長劉江華就單拖一人，一邊食早餐、一邊睇新聞。
政制及內地事務局政助陳岳鵬（Ronald）就比上司劉江華更早現身歎早餐，佢評價以位置、價錢及食物質素嚟講，飯堂都算可以，尤以炸雞髀係全隻炸，煮法最傳統喎，所以佢都關心新飯堂供應商質素好唔好。Ronald又向卓妮呻話，附近中信大廈快餐店同時裝修，嚟緊呢一個月，或者要早到十二點就出去買飯，否則就要同私人寫字樓打工仔「爭飯食」，隨時要排隊排半粒鐘都唔定。
員工分享五位數營業額
餐廳老闆李先生話，尋日營業額有五位數字，比平日多啲，佢之前講到明最後一日嘅收益會同員工分享，所以年資高嘅員工，都可以分到兩千多元。